შთამბეჭდავი ზრდის პარალელურად, საბაზრო კაპიტალიზაციის მხრივ მსოფლიოში უმსხვილეს კრიპტოვალუტაზე მსოფლიოს ყველა წერტილში საუბრობენ. მსოფლიო მედიამ დიდი ყურადღება დაუთმო ბიტკოინთან დაკავშირებით JPMorgan-ის გენერალური დირექტორის, ჯეიმი დაიმონისა და საერთაშორისო სავალუტო ფონდის ხელმძღვანელის, კრისტინ ლაგარდის მოსაზრებებს, რომელიც commersant.ge-მ ასევე შემოგთავაზათ.
ბიტკოინთან დაკავშირებით საინტერესო აზრი ასევე გამოთქვა კანადური მულტინაციონალური ფინანსური სერვისების კომპანიის, Royal Bank of Canada-ს გენერალურმა დირექტორმა, დევიდ მაკკეიმ. „ბიტკოინის მთავარ იდეას დღეს ფულის დამალული გზით გადაადგილება და კრიმინალური აქტივობის ხელშეწყობა წარმოადგენს. ზოგიერთი ადამიანი ბიტკოინს თაღლითობას უწოდებს, მე მათ არ ვეთანხმები. თუმცა მიმაჩნია, რომ საზოგადოებას ახლა ბიტკოინი არ სჭირდება,“ განაცხადა მან CNBC-სთან საუბრისას.
როდესაც ხელში დოლარი, ფუნტი, ან ევრო მიჭირავს, მე მზად ვარ იგი სასურველი საქონლისა თუ სერვისისთვის გადავიხადო. ასეთ დროს ფულის სიმყარეში დარწმუნებული ვარ, რადგან მას ზურგს პოლიტიკური სისტემა, ეკონომიკის სიმყარე და ცენტრალური ბანკის რეზერვები უმაგრებენ.“
„როდესაც ამ მახასიათებლებზე ვსაუბრობთ, შეგვიძლია მათი კრიპტოვალუტაზე მისადაგება? აღნიშნული კრიტერიუმების უმეტესობას ციფრული ვალუტა არ შეესაბამება: მის უკან მთავრობა და ქვეყნის ეკონომიკა არ დგანან, იგი არ რეგულირდება, მის წინააღმდეგ რეზერვები ვერ მოქმედებენ - მის მოსაპოვებლად მხოლოდ მაინინგია საკმარისი,“ განაცხადა მაკკეიმ.
უკანასკნელ პერიოდში ბიტკოინის წინააღმდეგ კრიტიკული შეფასებები ხშირად ისმის. შვეიცარიული გლობალური საფინანსო სერვისების კომპანიის, UBS-ის მიხედვით, ბიტკოინი და სხვა კრიპტოვალუტები „სპეკულაციურ საპნის ბუშტს“ წარმოადგენენ და საეჭვოა, რომ მათ რეალური ვალუტის ფუნქციები შეასრულონ. ხოლო ამერიკული მულტინაციონალური საბანკო და საფინანსო სერვისების კომპანია JPMorgan Chase-ის ხელმძღვანელმა, ჯეიმი დაიმონმა ბიტკოინს „თაღლითობა“ უწოდა. მისი თქმით, JPMorgan Chase-ს დატოვებს ნებისმიერი თანამშრომელი, რომელიც ბიტკოინით ვაჭრობს.
No comments:
Post a Comment